Umferð tekin að þyngjast

Umferð út úr borginni er tekin að þyngjast enda mesta ferðahelgi ársins framundan.

Samkvæmt upplýsingum frá lögreglunni á Selfossi var umferð í morgun mjög róleg og ennþá er hún ekki meiri en á meðalhelgi í sumar. Allt hefur gengið áfallalaust fyrir sig. Samkvæmt upplýsingum frá lögreglunni í Borgarnesi er mikil umferð í umdæminu enda er landsmót Ungmennafélags Íslands þar í gangi. Þrátt fyrir mikla umferð hefur hún að mestu leyti gengið snuðrulaust þar fyrir sig.

Eins og fram kom í fréttatilkynningu sem lögreglan sendi frá sér í gær verður áhersla lögð á eftirlit með ferðavögnum/eftirvögnum og skráningu og skráningarmerkjum ökutækja í umferðareftirliti um helgina. Slíkt eftirlit hefur verið mjög virkt hjá lögreglu síðustu vikur og hafa fjölmörg ökutæki verið stöðvuð og skoðuð á þjóðvegum í umdæminu.