Ökumaður fékk hjartaáfall

Lögregla hefur lokið rannsókn á umferðarslysi á Hafnarfjarðarvegi norðan Arnarnesbrúar að morgni 18. desember í fyrra þegar þrír létust. Bifreið var ekið til suðurs Hafnarfjarðarveg og yfir á akbraut fyrir umferð úr gagnstæðri átt þar sem árekstur varð.

Í krufningsskýrslu kemur fram að ökumaður bifreiðar sem ekið var suður Hafnarfjarðarveginn var meðvitundarlaus þegar áreksturinn varð. Hann hafði fengið hjartaáfall og var hann úrskurðaður látinn við komu sjúkralið á slysstað.

Rannsókn lögreglu miðaði að því meðal annars að áætla hraða ökutækjanna fyrir slysið og kanna öryggisbúnað þeirra. Þá var mögulegra orsaka leitað í líkamlegu ástandi ökumanna. Engar vísbendingar eru um hraðakstur í aðdraganda slyssins.

Í samræmi við hraðaútreikninga sem gerðir voru eftir óhappið jók bifreiðin sem ekið var suður Hafnarfjarðarveg hraðann eftir að hafa farið yfir hraðagreini á Hafnarfjarðarvegi, snérist á veginum, fór yfir autt svæði milli akbrauta til suðurs og norðurs Hafnarfjarðarveg og lenti á á bifreið sem ekið var úr gagnstæðri átt.