Kvikmynd um ævintýraför Thors Vilhjálms frumsýnd

Thor Vilhjálmsson gekk um 800 kílómetra til Santiago de Compostela á Spáni árið 2005. Ferðin var kvikmynduð og verður myndin, sem er í fimm hlutum, frumsýnd á næstunni. Thor lenti í ýmsu á ferðalaginu og var ráðlagt að vera með göngustaf til að berja frá sér villihunda.

„Þetta var svakalegt átak, að berjast við þreytuna og við í tökuliðinu að berjast fyrir okkar hlutum," segir kvikmyndagerðarmaðurinn Erlendur Sveinsson.

Thor Vilhjálmsson skáld fór í pílagrímsgöngu árið 2005 til Santiago de Compostela á Spáni. Erlendur og tökulið hans fylgdu Thor um 800 kílómetra leið og verður kvikmynd um förina gefin út í fimm hlutum. Myndin verður frumsýnd í Teatro Principal í hjarta Santiagoborgar 29. júlí og frumsýningar á Íslandi eru fyrirhugaðar í kvikmyndahúsi í haust og fram eftir vetri.

Erlendur segir ferðina hafa verið mikla ævintýraför, enda leiðin gríðarlega löng og erfið. „Það var allur þremillinn sem kom upp á," segir hann. „Þetta var ekki eins og að drekka vatn. Það var endalaust mótlæti. Maður var með hugmyndir um að ná ákveðnum hlutum og það var ekki alltaf hægt."

Myndin er að sögn Erlendar á mörkum heimildarmyndar og leikinnar myndar. Hann bætir þó við að raunverulegar hættur hafi skapast og að Thor hafi til að mynda veikst í ferðinni. „Það er reyndar ekki í fyrsta hlutanum, en hann veiktist í ferðinni," segir Erlendur. „Það var krítískt fyrir okkur, við vorum stopp og skáldið í rúminu. Við kölluðum á sjúkrabíl og það kom heilt gengi af mönnum í sæluhúsið til okkar. Við fundum út að hann myndi jafna sig. Og hann reis upp."

Villihundar eru líka stórhættulegir á svæðinu. Þegar rithöfundurinn Paulo Coelho fór sömu leið snéri hann til baka vegna hundsbits. Þá var hann staddur í bænum sem Thor var sem veikastur. Coelho skrifaði Alkemistann, en Thor þýddi hana á Íslensku.

- Réðust hundar á Thor?

„Hundar ógnuðu honum. Enda fékk hann ráð áður en hann lagði af stað frá séra Jakobi Roland í Landakotskirkju að fá sér göngustaf til að geta barið frá sér."