Gleymdi að spyrja um áverka

Mistök voru gerð hjá Neyðarlínunni á fimmtudagskvöld þegar starfskona á KFC í Kópavogi hringdi þangað vegna þriggja starfsbræðra sinna sem brenndust af gufu úr potti. Mennirnir þrír komu sér sjálfir á bráðamóttöku.

Dagný Halldórsdóttir, aðstoðarframkvæmdastjóri Neyðarlínunnar, segir konuna sem hringdi ekki hafa óskað eftir aðstoð heldur sett fram fyrirspurn.

„Það var spurt hvort ekki væri rétt að fara á neyðarmóttökuna vegna bruna af völdum heits vatns. Neyðarvörðurinn tók undir það og þannig lauk samtali þeirra,“ segir Dagný sem kveður viðbrögð neyðarvarðarins ekki hafa verið samkvæmt bókinni.

„Hann hefði átt að taka betur stjórn á símtalinu; afla upplýsinga um hvað væri um að vera og alvarleika áverkanna. Þetta hefði líklega leitt til þess að sjúkrabílar hefðu verið sendir,“ útskýrir Dagný. Aðspurð segir hún að samkvæmt upplýsingum frá lækni hafi þessi mistök þó ekki komið að sök. Mennirnir hafi komist fljótt á sjúkrahús.

Samkvæmt yfirlýsingu frá Helga Vilhjálmssyni, eiganda KFC, var það neyðarvörður sem átt frumkvæðið í samtalinu. „Spurði starfsmaður Neyðarlínunnar hvort viðkomandi væri þannig á sig kominn að annað starfsfólk treysti sér til að aka viðkomandi á neyðarmóttöku í Fossvogi. Það væri fljótlegasta leiðin,“ segir í yfirlýsingunni. Tveir starfsmannanna sem brenndust hafa verið útskrifaðir af sjúkrahúsi og sá þriðji er á batavegi. - gar