Mótmælendur safna fé fyrir bágstadda

Hópur fólks hefur tekið sig saman undir nafninu Sumarhjálp og ætlar að safna pening fyrir bágstadda borgarbúa. Forsvarsmaður söfnunarinnar er Helga Þórðardóttir, sem var oddviti Frjálslynda flokksins í síðustu borgarstjórnarkosningum.

„Þetta er algjörlega ópólitísk söfnun. Við erum í miklum tengslum við grasrótina og okkur misbauð hreinlega ástandið sem er í þessum málum," segir Helga sem segir hópinn hafa jafnramt staðið að mótmælunum gegn AGS á dögunum auk þess sem hann sé velt tengdur grasrótinni og Alþingi Götunnar.

Ásamt henni er Björg Sigurðardóttir sem einnig er í Frjálslynda flokknum og Gunnar Skúli Ármannsson, bloggari og eiginmaður Helgu.

Hópurinn hefur sent frá sér fréttatilkynningu þar sem gefið er upp reikningsnúmer og kennitala. Í tilkynningunni segir að enginn eigi að þurfa að svelta á Íslandi í dag. Fólk er hvatt til að sækja um styrk frá hópnum og tilgreina ástæður þess af hverju það þurfi á styrknum að halda.

„Við erum svo fimm manna hópur sem munum fara yfir umsóknirnar ásamt Þórhalli Heimissyni presti og velja hverjir fá munu styrk."

Sumarhjálp nýtur aðstoðar fyrirtækisins Öflun við framkvæmd söfnunarinnar. Í forsvari fyrir öflun er mótmælandinn frægi Kristín Snæfell Arnþórsdóttir. Hún segir Öflun vera rótgróið fyrirtæki með kennitölu frá 1995 sem sérhæfi sig í hjálpar- og líknarstarfsemi. Eina sem fyrirtækið taki fyrir þjónustuna sé gjald fyrir símkostnaði.

„Öflun tekur heilshugar þátt í þessu. Það er alvarlegt ástand í samfélaginu. Maður er búin að vera heyra í fólki og margir hafa það hræðilegt og sitja svo sannarlega ekki brosandi í sólinni niðri á Austurvelli," segir Kristín sem fór mikinn í mótmælum gegn AGS og ríkisstjórninni fyrir skömmu. „Ég henti eggjum og öðru í stjórnarráðið og skrifstofu AGS. Ég var svo hrædd að ég titraði en þeir handtóku mig ekki."

Kristín hvetur fólk til að hafa samband sem fyrst til að sjóðurinn getir byrjað að veita peningastyrki. Kennitala og reikningsnúmer Sumarhjálpar: 0313 - 13 - 131313 /550710-0720