Vill sjá hæfismat áður en næstu skref verða tekin

Ásta Sigrún Helgadóttir, fyrrverandi forstöðumaður Ráðgjafarstofu um fjármál heimilanna, segist bíða eftir að fá að sjá hæfismat um umsækjendur um stöðu Umboðsmanns neytenda, áður en hún ákveður sín næstu skref.

Ásta Sigrún var spurð að því úr félagsmálaráðuneytinu í dag, hvort hún hefði enn áhuga á því að taka að sér starfið. Ásta sagði í samtali við fréttastofu að sér hefði ekki verið boðin staðan.

Runólfur Ágústsson sagði upp störfum á fyrsta degi sínum í embættinu, með vísan til þess að hann nyti ekki trausts ráðherrans. Árni Páll Árnason, félagsmálaráðherra, sagði í yfirlýsingu í morgun, að hann hefði sagt Runólfi að hann gæti ekki setið áfram í starfi, hefði hann notið fyrirgreiðslu sem almenningi hefði ekki staðið til boða.

Ásta Sigrún var ásamt Runólfi metin hæfust til að gegna starfinu. Hún hefur óskað eftir skriflegum rökstuðningi frá ráðuneytinu. Í því felst, segir hún við fréttastofu, að fá að vita hvað í hæfismatinu fólst. Hún hafi starfað að þessum málum árum saman.

Sigurður Líndal, lagaprófessor, segir í samtali við fréttavef Morgunblaðsins, að auglýsa beri embætti umboðsmanns skuldara að nýju, þar sem skipað hefði verið í embættið.

Ásta Sigrún segist ekki hafa ákveðið hvort hún sæki um, verði embættið auglýst aftur. Aðspurð um hvað henni finnist um framgöngu ráðherra í málinu, segist hún sem minnst vilja um það segja. Málið sé samt sem áður „allt hið vandræðalegasta".