Fljúga til Húsavíkur í stað Akureyrar

Flugfélag Íslands hefur gert ráðstafanir til að fljúga áætlunarflug sitt til Húsavíkur í stað Akureyrar ef til verkfalls kemur hjá slökkviliðsmönnum á Akureyri næstkomandi föstudag.

„Gerðar hafa verið ráðstafanir til að flýta fyrstu tveimur brottförum föstudagsins þannig að þær lendi áður en til boðaðs verkfalls kemur en aðrar brottfarir þann dag munu verða til Húsavíkur ef til verkfalls kemur. Farþegar munu verða fluttir með hópferðabílum milli flugvalla á Akureyri og Húsavík," segir í tilkynningu frá flugfélaginu.

Þar segir einnig að haft verður samband við þá farþega sem eiga bókað á föstudaginn og þeir látnir vita um þær breytingar sem verða á þeirra flugi, farþegar geta jafnframt haft samband við þjónustuver Flugfélags Íslands.

„Flugfélag Íslands vonast til að aðilar nái saman þannig að hægt verði að aflýsa verkfalli en kostnaður félagsins og óþægindi farþega eru mikil vegna deilu sem Flugfélag Íslands á ekki aðild að."