Árni Páll nýtur stuðnings þingflokksins

„Ég get ekki betur heyrt og séð en að hann geri það," segir Þórunn Sveinbjarnardóttir, formaður þingflokks Samfylkingarinnar, aðspurð um hvort að Árni Páll Árnason félagsmálaráðherra njóti stuðnings þingsflokksins. Þingflokkurinn fundaði nú síðdegis.

Þórunn segir að fundurinn hafi ekki verið boðaður vegna afsagnar Runólfs Ágústssonar, nýskipaðs Umboðsmanna skuldara í gær. „Nei, það var búið að boða til þessa fundar í síðustu viku. Þetta var bara óformlegur þingflokksfundur að sumri til þar sem ýmis mál voru rædd."

Hún segir að staða Árna Páls innan flokksins hafi ekki verið rædd á fundinum. „Nei, en Árni Páll gerði okkur grein fyrir stöðunni vegna Umboðsmanns skuldara, því eins og alþjóð veit lét hann af störfum í gærkvöldi. Hann fór bara yfir það með okkur."

Aðspurð hvort að Árni njóti stuðnings þingflokksins, segir hún ekki sjá og heyra betur en hann geri það. „...enda sé ég svo sem ekki hvers vegna hann ætti ekki að gera það," segir Þórunn og tekur jafnframt fram að enginn ágreiningur um málið hafi komið upp á fundinum.