Búið að staðfesta það að Hiddink taki við Tyrkjum 1. ágúst

Guus Hiddink verður næsti þjálfari tyrkneska landsliðsins en þessi 63 ára Hollendingur er búinn að gera tveggja ára samning við tyrkneska knattspyrnusambandið. Hiddink tekur við þjálfun liðsins 1. ágúst næstkomandi.

Tyrkland verður fimmta landsliðið sem Guus Hiddink þjálfar en hann er nú að ljúka fjögurra ára starfi með rússneska landsliðið. Hiddink þjálfaði einnig Holland frá 1994 til 1998, Suður-Kóreu frá 2000 til 2002 og Ástralíu í eitt ár til og með HM í Þýskalandi 2006.

Hiddink tekur við tyrkneska landsliðinu af Fatih Terim sem þjálfaði liðið frá 2005 til 2009. Liðið náði aðeins 37,7 prósent árangri í 54 leikjum undir hans stjórn og mistókst að komast í úrslitakeppni HM í Suður-Afríku sem fer fram næsta sumar.

Landsliðsþjálfaraferill Guus Hiddink:

Holland (Desember 1994 - júlí 1998)

38 leikir

22 sigrar, 8 jafntefli, 8 töp

57,9 prósent árangur

Hápunktur: Undanúrslit á HM 1998



Suður-Kórea (Desember 2000 - júlí 2002)

29 leikir

17 sigrar, 6 jafntefli, 6 töp

58,6 prósent árangur

Hápunktur: Undanúrslit á HM 2002

Ástralía (júlí 2005 - júlí 2006)

12 leikir

7 sigrar, 2 jafntefli, 3 töp

58,3 prósent árangur

Hápunktur: 8 liða úrslit á HM 2006

Rússland (júlí 2006 - júní 2010)

26 leikir

16 sigrar, 4 jafntefli, 6 töp

61,5 prósent árangur

Hápunktur: Undanúrslit á EM 2008

Tyrkland (ágúst 2010 -)

Tyrkir eru í riðli með Þýskalandi, Austurríki, Belgíu, Kasakstan og Aserbaídsjan í undankeppni EM 2012.