Nýjar skólabyggingar teknir í notkun í Reykjavík

Í haust hefst skólastarf í þremur nýjum skólabyggingum í Reykjavík; Dalskóla, Sæmundarskóla og Norðlingaskóla. Undirbúningsstarf fyrir skólabyrjun er í fullum gangi og verða á fjórða tug skóla settir mánudaginn 23. ágúst.

Skólastarf hefur verið í bráðabirgðahúsnæði í Norðlingaskóla undanfarin ár, en í fyrra hófst kennsla í fyrsta hluta nýrrar byggingar í Sæmundarskóla, að því er fram kemur á vef Reykjavíkurborgar.

Dalskóli, sem er samrekinn leikskóli, grunnskóli og frístundaheimili í Úlfarsárdal, tekur til starfa í nýrri skólabyggingu. Á þriðja tug grunnskólanemenda setjast þar á skólabekk í haust, en að auki hafa 50 leikskólabörn verið innrituð í skólann. Skólastarf í Norðlingaholti og í Sæmundarskóla verður í vetur að hluta til í nýju skólahúsunum, en stefnt er að því að fullgera þau fyrir árslok 2012.

Þá kemur fram á vef Reykjavíkuborgar að um 14 þúsund nemendur hefja nám í 37 almennum grunnskólum í borgarinnar eftir hálfan mánuð. Þar af eru 1460 börn að hefja nám í 1. bekk. Rúmlega 400 nemendur eru skráðir í sex sjálfstætt starfandi skóla í borginni og á annað hundrað grunnskólanemendur stunda nám í þremur sérskólum.