Ráðherra ber fullt traust til Ástu

Árni Páll Árnason félagsmálaráðherra sagði fyrir þingflokksfund Samfylkingarinnar í dag að hann bæri fullt traust til Ástu Sigrúnar Helgadóttur, fyrrverandi forstöðumanns Ráðgjafastofu um fjármál heimilianna. Ásta sótti um embætti Umboðsmanns skuldara. Runólfur Ágústsson var hins vegar skipaður en lét af embættinu sama dag og hann tók við því.

Árni Páll sagði að Ásta Sigrún myndi koma til fundar í ráðuneytinu og hann sagði jafnframt að hún hefði unnið vel í störfum sínum fyrir Ráðgjafastofu um fjármál heimilanna. Árni Páll sagði að mikilvægt væri að leysa úr þeirri stöðu sem væri komin upp því að Umboðsmaður skuldara væri eitt mikilvægasta starfið í endurreisn íslensks samfélags.

Aðspurður út í ummæli Runólfs Ágústssonar í Kastljósi í gær sagðist Árni Páll ekki vilja fara í orðaskak við Runólf.

Ítarlega verður rætt við Árna Pál í kvöldfréttum Stöðvar 2.