Börn afgreidd um tóbak í fjórðungi tilfella

Í byrjun maí stóð forvarnarfulltrúi Hafnarfjarðar fyrir könnun meðal sölustaða tóbaks í Hafnarfirði. Í 27% tilfella gátu unglingarnir keypt tóbak. Það er betri niðurstaða en þegar síðast var kannað en þá gátu unglingarnir keypt tóbak á 32% sölustaða.

Könnunin var framkvæmd á þann hátt að tveir unglingar úr 10. bekk fóru á sölustaði undir eftirliti starfsmanna Hafnarfjarðarbæjar og reyndu að kaupa sígarettur. „Sex sölustaðir seldu unglingunum tóbak af 22 mögulegum," segir í tilkynningu frá forvarnafulltrúa bæjarins.

„Ekki var farið inn á staði með vínveitingaleyfi þar sem tóbak er selt. Frekari upplýsingar úr könnuninni eru sendar Heilbrigðiseftirliti Kópavogs- og Hafnarfjarðarsvæðisins þar sem unnið verður úr þeim eins og lög gera ráð fyrir. Sölustöðunum er seldu börnunum tóbak verður einnig send ábending frá forvarnarfulltrúa," segir ennfremur og því bætt við að búast megi við því að þeir staðir sem seldu börnum tóbak fái áminningu eins og kveður á um í lögum um tóbaksvarnir.

„Síðustu misseri hafa söluaðilar sett sér stöðugt skýrari reglur sem tryggja að aldurstakmörk séu virt. Meirihluti sölustaða í Hafnarfirði hefur gert sérstakt samkomulag við forvarnarnefnd sem miðar að því að leita allra leiða til að koma í veg fyrir sölu tóbaks til barna. Niðurstaðan nú er sú besta síðustu ár og má ætla að fjölgun kannana haldi söluaðilum betur við efnið en í síðustu könnun sem fram fór í mars seldu 32% sölustaða unglingunum tóbak."