Freddy Krueger mesta illmennið

Freddy Krueger hefur verið kosinn mesta illmenni hvíta tjaldsins í nýrri könnun tímaritsins SFX. Krüger gerði garðinn frægan í hryllingsmyndinni The Nightmare on Elm Street. Næst á eftir Krueger komu Pinhead úr Hellraiser og Michael Myers úr Halloween.

Í The Nightmare on Elm Street hrelldi Freddy bandarísk ungmenni í draumum þeirra í hverri myndinni á fætur annarri. Robert Englund hefur farið með hlutverk illmennisins, nú síðast í myndinni Freddy vs. Jason sem kom út fyrir sjö árum. Í væntanlegri mynd um kappann verður Englund þó fjarri góðu gamni því Jackie Earle Haley, sem lék í Watchmen, mun fylla hans skarð.

„Freddy Krueger var gríðarlega vinsæll á níunda áratugnum en niðurstöður könnunarinnar sýna að vinsældir hans eru enn miklar tveimur áratugum síðar,“ sagði ritstjóri SFX. „Hann er eitt fárra skrímsla nútímans sem hægt er að nefna í sömu andrá og Drakúla, sem er eitt mesta illmenni allra tíma.“