Georg Bjarnfreðarson sveitalúði í Ameríku

Ragnar Bragason, leikstjóri Vaktar-þáttanna, hefur lesið handritið að amerísku útgáfunni af Næturvaktinni sem handritshöfundurinn Adam Barr hefur unnið en Barr skrifaði handrit fyrir þætti á borð við Desperate Housewives og Will & Grace. Ekki liggur enn fyrir hvort farið verður í gerð pilot-þáttar eftir handritinu en að sögn Kjartans Þórs Þórðarsonar, framkvæmdastjóra Saga Film, ætti það að skýrast á næstunni.

Örlitlar breytingar hafa verið gerðar á persónum þáttanna eins og gefur að skilja fyrir bandaríska sjónvarpið. Þannig hefur nafni Ólafs Ragnars verið breytt í Tommy en að sögn Ragnars verður sú persóna að mestu leyti óbreytt. „Hann er umboðsmaður einhverrar hljómsveitar og það kemur mér í sjálfu sér ekkert á óvart að hann skuli hafa farið „ómengaður“ inn í handritið, hann er svona ameríski draumurinn holdi klæddur.“ Daniel, sem Íslendingar myndu seint kvitta upp á að væri eitthvert kyntröll, er hins vegar orðinn mikill kvennaljómi í bandarísku útgáfunni og segir Ragnar hafa lesið það út úr handritinu að hann eigi eftir að vera í tygjum við nokkra kvenmenn og að í uppsiglingu sé hugsanlegur ástarþríhyrningur. Þess ber þó að geta að Daníel mun eftir sem áður heita Daniel.

Mesta breytingin verður hins vegar á Georg Bjarnfreðarsyni. Ragnar segir það ekki hafa komið sér á óvart. „Georg er náttúrlega kommúnisti í íslensku þáttaröðunum og slíkt er náttúrlega dauðasök í Ameríku, að vera kommi er nánast verra en að vera morðingi. Þannig að hann er gerður að svokölluðum „survivalist“,“ útskýrir Ragnar en slíkir menn eru náskyldir „rednecks“ eða sveitalúðum. „Hann á allavega einhverja þannig vini og hreykir sér af því að geta lifað einn af úti í villtri náttúrunni með einn hníf að vopni,“ segir Ragnar og bendir á að þetta sé nokkuð skondið. „Georg og Ólafur voru náttúrlega andstæður, hin gömlu stórveldi, Sovétríkin og Ameríka.“

Þá segir Ragnar að miklar breytingar hafi verið gerðar á andrúmslofti þáttanna. Í frumútgáfunni hafi þeir leyft sér að hafa langar þagnir og atriði þar sem lítið var að gerast í raun og veru. „Bandaríkjamenn hafa ekki alveg þolinmæði fyrir slíku, þeir vilja meiri keyrslu og meiri hraða, svona svipað og var gert með amerísku útgáfuna af The Office,“ segir Ragnar og bætir loks við að bandaríska útgáfan gerist á bensínstöð í úthverfi Los Angeles.

freyrgigja@frettabladid.is