Lögmenn Jóns tóku við kyrrsetningarbeiðninni

Breskir lögmenn Jóns Ásgeirs Jóhannessonar hafa fengið í hendur kyrrsetningarbeiðni frá slitastjórn Glitnis. Stefnan var afhent lögmönnum Jóns klukkan eitt að íslenskum tíma í London í dag. Steinunn Guðbjartsdóttir formaður slitastjórnar staðfestir að stefnunni hafi verið komið til lögmanna Jóns Ásgeirs og að það sé fullnægjandi.

Nú hefur Jón 48 klukkustundir til þess að skila lista yfir eignir sínar en geri hann það ekki á hann yfir höfði sér fangelsi. Steinunn segir að lögmenn Jóns hafi ekki farið fram á frest til þess að skila eignalistanum þannig að búast má við því að skrá yfir eignir hans verði afhent á laugardaginn kemur.

Fyrr í dag sagði breska blaðið Guardian að Jóni hafi verið afhent stefnan í New York en það mun ekki vera rétt.