Vakti mikla lukku í Kaupmannahöfn

„Þetta gekk rosalega vel. Ég á í viðræðum við verslanir í Tokyo, París, London, Kaupmannahöfn, Kanada og nokkrar vefverslanir að auki þannig að móttökurnar hafa bara verið mjög góðar,“ segir fatahönnuðurinn Sonja Bent sem er nýkomin heim frá Danmörku eftir að hafa tekið þátt í tískuvikunni í Kaupmannahöfn.

Sonja fékk í kjölfarið boð á tískuvikuna í Berlín og Pret a porter í París auk þess sem fjölmiðlar sýndu hönnun hennar mikinn áhuga. „Ég er búin að staðfesta þátttöku mína á tískuvikuna í París en er enn að velta fyrir mér boðinu til Berlín. Í París tek ég þátt í sölusýningu sem er sérstaklega ætluð ungum fatahönnuðum og er meira eins og listræn innsetning heldur en eiginleg sölusýning. Í staðinn fyrir að hengja hönnun okkar á gínur og herðatré gerum við innsetningu, sem er mjög spennandi,“ útskýrir Sonja.

Aðspurð segist hún ánægð með þá athylgi sem hönnun hennar hlaut á tískuvikunni í Kaupmannahöfn. „Ég er mjög ánægð með þessar góðu undirtektir enda virkar þetta mjög hvetjandi á mann og ég tek þessu sem hrósi. Það skemmir heldur ekki fyrir að ég var á frábærum stað á sölusýningunni í Kaupmannahöfn, alveg við hliðin á barnum,“ segir hún og hlær.

Sonja á einnig í viðræðum við framleiðendur úti í heimi um að framleiða hönnun hennar, en hingað til hefur hún að mestu séð um allan saumaskap. Auk þess er hún að undirbúa sig fyrir tískusýningu sem fram fer í Makedóníu þann þriðja september. „Maður er á fullu alla daga,“ segir hönnuðurinn að lokum. -sm