„RÚV glopraði keppninni úr höndum sér“

Ríkisútvarpið hafði langan tíma til þess að tryggja sér sýningarréttinn að heimsmeistaramótinu í handbolta áður en Stöð 2 ákvað að kaupa réttinn eins og greint var frá í gær. Forstjóri 365 segir RÚV hinsvegar hafa reynt að yfirbjóða samninginn sem að lokum var gerður.

Páll Magnússon útvarpsstjóri gagnrýndi málið harðlega í gær og sagði það dapurleg tíðindi fyrir handboltaunnendur. Í viðtali í síðdegisútvarpi Rásar 2 í gær sagði hann umhugsunarvert að Stöð 2 geti „tekið silfurdrengina frá almenningi og læst þá inni í lokuðu áskriftarsjónvarpi." Þá beindi hann því til menntamálaráðherra að gera kröfu um að mótið verði sýnt í opinni dagskrá.

„Mér finnst viðbrögð útvarpsstjóra við því að Stöð 2 semji um HM í handbolta vera ákaflega lágfreyðandi," segir Ari Edwald, forstjóri 365. „RÚV glopraði keppninni úr höndum sér því það var seljandi efnisins sem kom sér á framfæri við okkur, ekki einu sinni heldur margsinnis, allar götur síðan í febrúar." Því hafi RÚV haft marga mánuði til þess að semja um sýningarréttinn.

RÚV reyndi yfirboð

Að sögn Ara snýst málið alls ekki um yfirboð af hálfu Stöðvar 2. „Við höfum hinsvegar upplýsingar um það frá seljandanum að RÚV reyndi að yfirbjóða okkar samning þegar hann lá fyrir og sagðist raunar geta boðið enn betur ef þyrfti."

Ari segir það hinsvegar ekkert nýtt að Stöð 2 taki við keflinu þegar RÚV er ekki að standa sig, þannig hafi það til dæmis verið með flesta leiki karlalandsliðsins í knattspyrnu, eins og á móti Liechtenstein í dag.

„Við höfum líka þurft að fóstra stærstu menningarviðburðina í íslensku sjónvarpi eftir að RÚV hefur ýtt þeim frá sér," segir Ari ennfremur og segir það til dæmis eiga við um Edduverðlaunin, leiklistarverðlaunin Grímuna, Íslensku tónlistarverðlaunin og Söngkeppni framhaldsskólanna. „Þannig að ég held að Páll Magnússon verði að líta í eigin barm varðandi óstjórn á dagskrármálum RÚV frekar en að koma fram í þáttum Ríkisútvarpsins eins og einhver kóngur til þess að ata samkeppnisaðila sína auri og alls kyns rangfærslum," segir Ari.

Ekkert heyrt frá ráðuneytinu

Katrín Jakobsdóttir menntamálaráðherra sagði í samtali við Vísi í gær að hún væri með það í skoðun að krefjast þess að leikir íslenska liðsins á HM verði sýndir í opinni dagskrá. „Ráðuneytið hefur ekkert kynnt sér okkar hlið á þessum málum eða hvernig við ætlum að standa að hlutunum," segir Ari sem hefur enga trú á því að menntamálaráðherra ráðist í þesskonar aðgerðir eftir á, þegar alþjóðlegur söluaðili er búinn að selja réttinn að keppninni miðað við ákveðnar forsendur.

„Það hlýtur að vera þannig, ef einhverjir hlutir eru svo mikil menningarverðmæti að slík sjónarmið eiga við, að ríkisvaldið leggi það þá niður fyrir sig fram í tímann og með einhverjum almennum prinsippum. Það er afskaplega skrítið ef fólk heldur að það geti komið að hlutunum eftir á í þessu sambandi," segir Ari og bætir því við að hann hafi ekki trú á að eitthvað gerist í þeim málum án þess að ráðherra kynni sér málið betur.