Aðgerðirnar skýrt verkfallsbrot

Annar hluti boðaðra verkfallsaðgerða Landssambands slökkviliðs- og sjúkraflutningamanna fór fram í gær. Verkfallið stóð í sextán klukkutíma.

Í þeim fólst meðal annars að varðstöðu á Akureyrarflugvelli var ekki sinnt og hamlaði flugi. Flugfélag Íslands brá þá það ráð að flýta tveimur fyrstu ferðum dagsins og aðrar ferðir voru færðar til Aðaldalsflugvallar á Húsavík.

Landssamband slökkviliðs- og sjúkraflutningamanna telur að þær aðgerðir séu skýrt verkfallsbrot. Í tilkynningu sem sambandið hefur sent fjölmiðlum segir að starfsmenn stéttarfélaga sem vinna við innanlandsflug ganga í þau störf sem félagsmenn LSS sinna ekki í löglega boðuðum verkfallsaðgerðum. Sambandið telur að óneitanlega vakni upp spurningar hvort nægilega hafi verið gætt að öruggi á Aðaldalsflugvelli á Húsavík.

Fullur vilji til að setjast aðð samningaborði og leysa deiluna

„Í aðdraganda boðaðra aðgerða reyndi LSS, líkt og hingað til, að leysa úr ágreiningsmálum vegna framkvæmdar verkfallsins á friðsaman hátt, en án árangurs. Fyrir liggur að hart verður brugðist við brotum sem þessum, komi þriðji hluti boðaðra verkfallsaðgerða LSS, til framkvæmda föstudaginn 13. ágúst n.k. Ekki er tímabært að skýra að svo stöddu frá í hverju þau viðbrögð felast.

LSS bindur þó enn vonir við að samkomulag takist við LN áður en til verkfallsaðgerða kemur n.k. föstudag og lýsir enn og aftur yfir fullum vilja til að setjast að samningaborði og leysa deiluna," segir í tilkynningunni.