Tilraun til að eyða lúpínu mistókst

Tilraun til að eyða lúpínu í Þórsmörk, með illgresiseitrinu Roundup, á árinum 2007-9 mistókst, segir skógrækt ríkisins. Greint er frá því á heimasíðu skógræktarinnar að eitrunin hafi eytt öllum öðrum gróðri en lúpínan hafi verið fljót að spretta að nýju af fræi. Hún hafi síðan verið meira eða minna einráð á þeim svæðum þar sem eitrað var. Plöntueitrið Roundup virðist því, að mati skógræktarinnar, ekki vera viðunandi leið til að flýta fyrir eyðingu lúpínu og því síður að stuðla að því að hún hopi fyrir öðrum gróðri.

Skógræktin hefur gagnrýnt þá niðurstöðu Landgræðslunnar og Náttúrufræðistofnunar, að mæla með því að plöntueitrið verði notað til að eyða lúpínu. Stofnanirnar lögðu það til í skýrslu til umhverfisráðherra í vor að eitrið mætti nota til að uppræta lúpínu í þjóðgörðum, friðlýstum svæðum og svæðum í yfir 400 metra hæð yfir sjávarmáli.