Kanna heimildir um birtingu á lögfræðiáliti

Í tilkynningu sem Seðlabanki Íslands hefur sent fjölmiðlum segir að þegar að álit, um það hvort að gengistryggð lán væru hugsanlega ólögleg vorið 2009, var unnið hafði átt sér stað töluverð umræða á opinberum vettvangi um hugsanlegt ólögmæti gengistryggðra lána.

„Bankinn var um þær mundir að skoða möguleika þess að lögaðilar tækju erlend lán í íslenskum krónum í ný gjaldeyrisskapandi fjárfestingarverkefni sem yrðu endurgreidd í erlendri mynt," segir í tilkynningu og í framhaldinu vildi bankinn kanna hvort vafi léki á lögmæti slíks gjörnings.

Þá segir að Seðlabanki Íslands sé ekki dómstóll og geti ekki skorið úr um lögmæti gjörnina. „Það væri því í hæsta máta óviðeigandi ef hann hefði á þessum tíma gefið frá sér einhverjar yfirlýsingar þar að lútandi."

Bankinn segir að það sé of mikið fullyrt um það að hann hafi vitað af ólögmæti gengistryggðu lánanna. Bankinn hafi haft í höndum eitt lögfræðiálit þess efnis að það væri ekki ólíklegt að svo væri. „Á móti stóðu álit ýmissa annarra lögfræðinga sem gengu í aðra átt."

„Seðlabanki Íslands hefur ekki heimild til að afhenda fjölmiðlum umrætt álit án samþykkis viðkomandi lögfræðistofu. Minnisblað aðallögfræðings verður ekki slitið úr samhengi við álitið. Eftir helgi verður skoðað hvort slíkrar heimildar verður aflað," segir meðal annars í tilkynningunni.

Þá segir að allar þær stofnanir og ráðuneyti sem koma að fjármálastöðugleika vissu að hugsanlega kæmust dómstólar að því að lánin væru ólögleg. „Það var reyndar á allra vitorði. Því hafði nefnd um fjármálastöðugleika sem þessir aðilar eiga sæti í en efnahags- og viðskiptaráðuneyti hefur formennsku í fjallað um málið svo mánuðum skipti áður en dómur hæstaréttar féll,“ segir í tilkynningunni og þar segir einnig að  Seðlabankinn geti ekki upp á sitt einsdæmi gefið upplýsingar um starf nefndarinnar.