Krefjast þess að öryggi verði tryggt

Landssamband slökkviliðs- og sjúkraflutningamanna skorar á sveitarfélög landsins að gera réttmæta leiðréttingu á launum slökkviliðs- og sjúkraflutningamanna til þess að neyðarþjónusta við íbúa landsins verði tryggð. Þetta segja þeir í áskorun sem birt var fulltrúum sveitastjórna á höfuðborgarsvæðinu, í Fjarðarbyggð, á Akureyri og á Suðurnesjum í morgun eftir að 16 klukkustunda verkfall hófst.

Slökkviliðs- og sjúkrafutningamenn benda á að þeir standi vörð um öryggi og velferð íbúa landsins og þá sem þar fari um og dvelji, enda sé réttmæt krafa íbúa landsins að öryggi þeirra og þjónusta við þá á neyðarstundu sé trygg. Þeir benda á að kröfurnar til þess að geta hafið störf séu að lágmarki sveinspróf í iðngrein eða sambærilegt nám og að auki meirapróf. Eftir ráðningu taki við 1070 klukkustunda nám. Auki þess fari nokkuð margir í 300 klukkustunda nám í leitar- og björgunarköfun, 80 klukkustunda nám í fjallabjörgun eða 9 mánaða nám í bráðatækni.

Slökkviliðsmenn segja að það að greiða slökkviliðs- og sjúkraflutningamönnum laun sem séu lægri en þeir fengju, ef þeir störfuðu við sína iðngrein, hljóti að teljast óeðlilegt miðað við þær kröfur sem gerðar séu til þeirra.

Slökkviliðs- og sjúkraflutningamenn ætla að tendra í grilli á Austurvelli í hádeginu og bjóða gestum og gangandi upp á pylsur og um leið vekja athygli á starfi sínu og starfsumhverfi.