Skiptu með sér milljónum

Vinningshafarnir tveir sem skiptu með sér 1. vinningi í Lottóinu um síðastliðna helgi eru báðir komnir fram.

Annan vinningsmiðann eiga hjón sem keyptu miðann í Happahúsinu í Kringlunni á laugardaginn. Að þeirra sögn eru þau varla ennþá búin að átta sig á þessu, en þau hafa spilað reglulega í Lottóinu í nokkurn tíma án þess að vinna neitt að ráði. Samkvæmt upplýsingum frá Íslenskri getspá vakti konan manninn sinn því með gleðifréttir á sunnudagsmorguninn þegar hún tilkynnti honum að þau væru með allar tölurnar réttar á lottómiðanum sínum og væru búin að vinna rúmlega 26 milljónir.

Hinn vinningsmiðann á ung kona en hún er með tölurnar sínar í áskrift. Hún var ekki búin að athuga miðann sinn þegar Íslensk getspá hafði samband við hana og komu fréttirnar henni á óvart. Þetta er þó ekki fyrsti vinningur ársins hjá þessari ungu konu því að hún eignaðist son í vor og er það annað barn hennar og eiginmanns hennar.