Grindvíkingar saka ríkisstjórnina um vonda stjórnsýslu

Meirihluti bæjarráðs Grindavíkur er reiðubúinn til viðræðna um að stytta leigutíma HS Orku á auðlindum sem fyrirtækið hefur til nýtingar á Suðurnesjum. Á fundi bæjarráðs Grindavíkur í gær var samþykkt ályktun þar sem hörmuð er sú óvissa sem nú ríkir um eignarhald HS Orku og fullyrt að hún stefndi atvinnuuppbyggingu á svæðinu í hættu.

Bæjarráð Grindavíkur vekur athygli á því í ályktuninni að þær orkuauðlindir sem HS Orka hefur til nýtingar á Suðurnesjum eru í eigu Grindavíkurbæjar og Reykjanesbæjar, en ekki HS Orku. HS Orka greiði sveitarfélögunum ákveðið auðlindagjald sem samfélagið njóti góðs af. Þá segir bæjarráð að við sölu HS Orku til Magma Energy hafi öllum lögum og leikreglum verið fylgt varðandi erlenda fjárfestingu. Ríkisstjórnin hafi haft ýmis tækifæri undanfarin misseri til að grípa til þeirra ráðstafana sem hún telur nauðsynleg, en kosið að gera það ekki. Það sé ekki góð stjórnsýsla að breyta reglunum eftir á.

Í bókun minnihluta bæjarráðs við ályktunina segir að enn sé fjölmörgu ósvarað í málinu og því nauðsynlegt að bíða eftir áliti þeirrar nefndar sem nú vinnur að því að skera úr um lögmæti sölunnar. Því sé ekki tímabært að taka undir ályktun meirihlutans.