Grunur um salmonellusmit

Grunur leikur á um salmonellusmit í ferskum kjúklingi framleiddum af Matfugli ehf. Í tilkynningu frá fyrirtækinu kemur fram að frekari rannsókna sé þörf til þess að staðfesta gruninn en þangað til þyki fyrirtækinu rétt að innkalla vöruna. Um er að ræða kjúkling með rekjanleikanúmerunum (Rlnr.) 011-10-24-5-31. Dreifing á vörunni hefur verið stöðvuð. Í samræmi við innra eftirlit fyrirtækisins og í samráði við heilbrigðisyfirvöld hefur jafnframt verið unnið að innköllun vörunar.

Hafi fólk ferska kjúklinga heima hjá sér er það beðið um að gæta að rekjanleikanúmerinu, sem er að finna á umbúðunum, og skila kjúklingnum í viðkomandi verslun eða beint til Matfugls ehf., Völuteigi 2, Mosfellsbæ.

Tekið er fra í tilkynningunni frá Matfugli að þessi kjúklingur er hættulaus fari neytendur eftir leiðbeiningum um eldun kjúklinga, steiki í gegn og passi að blóðvökvi fari ekki í aðra vöru. Kjúklingur með öðru rekjanleikanúmeri en þessu er í lagi.