Ekkert flogið frá Reykjavíkurflugvelli

Ekkert hefur verið flogið til Vestmannaeyja, Egilsstaða og Akureyrar í morgun sökum þoku í Reykjavík.

Samkvæmt upplýsingum frá Flugfélagi Íslands fór ein vél til Ísafjarðar klukkan átta í morgun en svo stöðvaðist allt flug. Næsta athugun fer fram rúmlega tíu og verður þá tekin ákvörðun um hvort farið verður í loftið.

Hægt er að fylgjast með gangi mála á textavarpinu en einnig eru farþegar hvattir að hafa samband við Flugfélag Íslands. Þá er ráðgert að Herjólfur fari sjö ferðir til og frá Vestmannaeyjum í dag og bætist þá enn við fjölda Þjóðhátíðargesta.