Árni Páll neitar ásökunum um pólitíska ráðningu

Árni Páll Árnason, félagsmálaráðherra hefur kallað eftir frekari upplýsingum um skuldamál Runólfs Ágústssonar nýskipaðs umboðsmanns skuldara. Árni Páll neitar því að ráðningin hafi verið pólitísk.

Félagsmálaráðherra segir að Runólfur hafi verið ráðinn í kjölfar hæfnismats og niðurstaða þess hafi verið afskaplega skýr. „Það auðvitað munum við birta með rökstuðningi fyrir ráðningunni. Það voru skýr rök fyrir ráðningunni, efnisleg rök. Þetta verður allt kynnt með gagnsæjum hætti," segir Árni Páll.

DV greindi frá því í síðustu viku að Runólfur hefði fengið afskrifaðar 500 milljónir króna. „Ég hef rætt það mál við hann og sent bréf í morgun, þar sem ég óskaði eftir frekari upplýsingum um það mál. Það sem hefur verið í umræðunni er flókið og ekki auðvelt að átta sig á því og ég hef beðið um greinargerð um skuldaskil hans og hans félaga aftur í tímann. Ég held að það sé mjög mikilvægt að það ríki enginn vafi um það að umboðsmaður hafi ekki fengið annars konar fyrirgreiðslur en almenningi stendur til boða," segir Árni Páll.

Árni Páll segir að Runólfur verði að gera grein fyrir sínum málum. Í kjölfar þess verði hægt að meta stöðuna. Árni Páll segist hafa vitað að Runólfur lagði fram fé í viðskiptum og tapað því. Hann segist ekki hafa haft upplýsingar um skuldaskil hans.

Félagsmálaráðherra segir að almennt hafi skuldastaða fólks ekki áhrif á það hvort það nýtur embættisgengis og það sé mikilvægt viðmið.

„Hitt er svo aftur annað mál að það skiptir máli að það sé hafið yfir vafa að umboðsmaður hafi ekki fengið önnur kjör við meðferð síns skuldavanda en almennt er í boði og það þarf auðvitað að upplýsa það og það sé ég ekki miðað við þau gögn sem hafa verið í opinberri umræðu," segir Árni Páll.