Sprengjan hugsanlega hvellur út frá dekki á vörubíl

„Þetta er mjög alvarlegt mál," segir Aldís Hafsteinsdóttir, bæjarstjóri í Hveragerði. Vísir sagði frá því í dag að grunur hafi verið að sprengiefni hafi verið skilið eftir á almannafæri í bænum og hluti þess sprungið í síðustu viku. Aldís segir að það geti verið að fólk sé að rugla saman tveimur atburðum.

Finnst ekkert

Aldís segir að lögreglan og Sprengjusveit Landhelgisgæslunnar séu búin að skoða svæðið og ræða við þá sem önnuðust sprengjuvinnuna fyrir tveimur árum. „Og þeir segjast þess fullvissir að það hafi verið sprengt í öllum holum og engin sprengiefni hafi verið skilin eftir. Það er búið að skoða svæðið og það mælist og finnst ekki neitt. Það finnast engin merki um ósprungið sprengiefni en lögreglan ætlar að vera vakandi fyrir þessu. Það er mjög ólíklegt að þarna hafi eitthvað orðið eftir," segir Aldís.

Dekk sprakk á vörubíl

Aldís veit ekki hvaðan fréttirnar af sprengjunni koma. „Ég bara veit það ekki hreinlega, ég hef heyrt það í dag að það hafi sprungið dekk á stórum vörubíl á svipuðum stað á sama tíma og það hafi myndast gríðarlegur hvellur út frá því. Mig grunar að fólk geti verið að rugla þessu tvennu saman."

Fólk ræddi þetta sín á milli

Hún biður þá sem hafi heyrt hvellinn og telja að þarna hafi verið um sprengju að ræða að hafa samband við bæjaryfirvöld eða lögreglu. „Mér þætti óskaplega vænt um ef einhver gæti komið með staðfestingu á að þarna hafi orðið sprenging á svæðinu. Lögreglan er búin að leita af sér allan grun og það hefur ekki verið sprengt þarna í tvö ár."

En var íbúum bæjarins brugðið þegar fréttir af sprengjunni bárust? „Fólk ræddi þetta náttúrlega heilmikið en það treystir því að þegar hlutirnir eru komnir í þennan farveg, að lögreglan sé komin í málið, er allt gert til að tryggja öryggi íbúanna eins og núna hefur verið gert," segir hún að lokum.