Mestu flóð í Pakistan í manna minnum

Tvær og hálf milljón manna hefur orðið fyrir áföllum vegna flóðanna í Pakistan. Mjög er óttast að farsóttir breiðist út. Rauði kross Íslands ætlar að veita neyðaraðstoð.

Þetta eru mestu flóð sem orðið hafa í Pakistan í manna minnum. Að minnsta kosti 1500 hafa farist og búist við að sú tala eigi eftir að hækka verulega.

Í mörgum héruðum hefur fólk einangrast og þaðan berast ekki tölur um manntjón. Það gerir hjálparstarfið ennþá erfiðara að samgöngur eru mikið til úr skorðum og fjarskipti sömuleiðis.

Vegir eru á kafi í vatni og fjarskiptamöstur hafa brotnað.

Flóðin hafa nú staðið í tíu daga og það er spáð áframhaldandi úrkomu.

Mjög er óttast að kólera breiðist út með menguðu vatni, þar sem fólk hefur leitað sér skjóls í tjaldbúðum.

Rauði kross Íslands hefur ákveðið að senda 3,5 milljónir króna úr neyðarsjóðum sínum til hjálparstarfsins.

Í því skyni hefur verið opnað fyrir söfnunarsíma samtakanna sem er 904 1500. Þegar hringt er í þetta númer bætast 1500 krónur við næsta símreikning.

Eitt svona símtal á Íslandi gæti bjargað mannslífum í Pakistan.