Þaulvanur sauðaþjófur á ferð

Sauðaþjófur, sem greinilega kann að gera að lambsskrokkum, að sögn lögreglu, var á ferð í Dölunum um helgina og fundust leifar af lambi eftir hann undir brúnni yfir Miðá í Dölum í gær.

Að sögn lögreglu skar hann lambið á háls, hirti svo læri, farmpart og hrygg, en henti verðminni bitum. Þá skar hann eyrnamerki úr hægra eyranu til að uppruni lambsins sæist ekki, en gleymdi hefðbundnu marki á vinstra eyra, sem sýnir hvaðan lambið var.

Lögreglan í Búðardal biður alla þá, sem einhverjar vísbendingar geat gefið um þetta níðingsverk, að láta sig vita.-