Andrés segir ummæli Daniels Hannan „hlægileg"

Andrés Pétursson, formaður Evrópusamtakanna, segir að ummæli Daniels Hannan um að hagsmunum Breta væri betur borgið í EES-samstarfinu en í Evrópusambandinu algjörlega hlægileg. Hann segir að Hannan sé eindreginn ESB-anstæðingur og setja þurfi skoðanir hans á Evrópumálum í það samhengi.

Bretinn Daniel Hannan þingmaður á Evrópuþinginu lýsti þeirri skoðun í kvöldfréttum Stöðvar 2 að hagsmunum Íslands væri miklu betur borgið utan Evrópusambandsins. Andrés Pétursson, formaður Evrópusamtakanna sem berjast fyrir því að Ísland gangi í Evrópusambandið, segir að Daniel Hannan sé eindreginn andstæðingur ESB og því verði að skoða ummæli hans í því ljósi.

„Ég myndi nú ekki taka boðskap Daniel Hannan sem einhvern algildan sannleika í þessu máli. Hann er þekktur Evrópuandstæðingur og er í útjaðri Íhaldsflokksins. Hann hefur m.a verið settur niður af flokknum í Bretlandi fyrir ýmis ummæli sín, m.a um breska heilbrigðiskerfið og annað," segir Andrés.

Daniel Hannan sagði í fréttum Stöðvar 2 í gær að þingmenn Evrópuþingsins héldu að Íslendingar væru svo örvæntingarfullir vegna ástandsins hér á landi að þeir myndu í raun og veru samþykkja hvaða aðildarskilmála sem er að loknum aðlögunarviðræðum.

„Ég skil nú eiginlega ekki þessi ummæli og þau dæma sig eiginlega sjálf. Langflestar þjóðir sem hafa gengið inn í Evrópusambandið hafa gengið inn í kreppu og menn hafa séð ákveðna leið og lausn að ganga í Evrópusambandið."

En erum við ekki í miklu betri samningsstöðu þegar við erum búin að rétta okkur af hérna heima? „Jú, það má segja það, enda höfum við í Evrópusamtökunum og Evrópusinnar almennt alltaf haldið því fram að við eigum að semja þegar við erum í styrkleika," segir Andrés.

Daniel Hannan sagðist gjarnan vilja skipta á þeim skilmálum sem Bretar hefðu sem fullgildir meðlimir í ESB og þeim skilmálum sem Íslendingar hefðu í EES-samstarfinu.

„Þetta er í raun og veru mjög undarleg ummæli frá þingmanni sem á að vita betur. (...) Þetta eru á margan hátt eiginlega hlægileg ummæli," segir Andrés.