Formannsframbjóðendur fordæma aðild Breta að innrásinni í Írak

Tveir frambjóðendur í leiðtogakjöri breska Verkamannaflokksins fordæma innrás bandamanna í Írak vorið 2003. Þeir segja að flokkurinn hefði aldrei átt að styðja árásina.

Ed Balls, fyrrverandi barnamálaráðherra, segir að ákvörðun Tony Blair, fyrrverandi formann flokksins og forsætisráðherra, um að ráðst á Írak hafi verið mikil mistök sem Bretar gjaldi ennþá dag dýru verði. Balls segir að miðað við þær upplýsingar sem lágu fyrir á sínum tíma hafi breska ríkisstjórnin aldrei átt að ráðast inn í Írak ásamt Bandaríkjamönnum og fleiri þjóðum.

Ed Miliband, fyrrverandi ráðherra orkumála, tekur í sama streng. Hann segir að Verkamannaflokkurinn og forysta flokksins hafi gert mikil mistök. Vopnaeftirlitsmenn Sameinuðu þjóðanna hafi átt að fá mun meiri tíma til kanna betur hvort Írakar ættu kjarnorkuvopn.

Þriðji frambjóðandinn, David Miliband sem gegndi embætti utanríkisráðherra í ríkisstjórn Gordons Browns, segir aftur á móti mikilvægt að kosningabaráttan og valið á nýjum formanni komi ekki til með að snúast um innrásina í Írak. Flokksmenn verði að snúa sér að öðrum málefnum.

Af þeim sex sem þegar hafa lýst yfir framboði þykir David líklegastur til þess að ná kjöri í embættið. Nýr formaður tekur við á landsfundi Verkamannaflokksins í september.