Ósáttur við að allt sé lokað á háannatíma

„Þetta er háannatími og það er allt lokað af því það er sunnudagur," segir Steinar Pálmason, sem rekur gistiheimilið Álftaland á Reykhólum. Hann segist hafa tekið á móti þrjátíu Þjóðverjum í morgun en hafi ekki getað farið með þá á hlunnindasýningu sem er á svæðinu vegna þess að allt sé lokað. Hann hefur reynt að ná í sveitarstjórann í allan dag án árangurs.

„Við erum að reyna að halda uppi ferðamannaiðnaði hér á Vestfjörðunum og það litla sem er í boði er bara lokað," segir Steinar sem segist hafa reynt að ná tali af sveitarstjóranum Óskari Steingrímssyni en án árangurs. „Hann svarar ekkert símanum. Mig langar til að spyrja hann: Hvað veldur því að allt sé lokað?"

Steinar á von á tuttugu Spánverjum nú síðdegis. „Þeir eiga örugglega eftir að segja, eigum við að fara á hlunnindasýninguna? En ég verð að segja: Nei, það er bara lokað," segir Steinar en hlunnindasýningin er það sem ferðamenn sækjast eftir að skoða að hans sögn.

Ekki náðist í Óskar Steingrímsson, sveitarstjóra Reykhólahrepps, við vinnslu fréttarinnar.