Rokkarar komnir í jólastuð

Rokksveitirnar Endless Dark og Agent Fresco eru önnum kafnar við að æfa jólalög fyrir hina árlegu X-mas tónleika.

Hinir árlegu X-mas tónleikar X-ins 977 fara fram á Sódómu Reykjavík á föstudagskvöld. Fimmtán hljómsveitir stíga á svið, þar á meðal Dikta, Endless Dark, Ensími, Cliff Clavin, Bloodgroup og Jónas Sigurðsson. Aðgangseyrir er 977 krónur og rennur hann óskiptur til Stígamóta. Húsið verður opnað klukkan 20 og fer fyrsta band á svið hálftíma síðar.

Endless Dark hafði ekki ákveðið hvaða jólalag hún ætlaði að taka í gær en tvö sígild koma til greina, „Þú komst með jólin til mín“ með Björgvini Halldórssyni og „Ég hlakka svo til“ með dóttur hans Svölu.

„Við erum vanir því að setja lög í nýjan búning en við höfum aldrei þurft að spila jólalag,“ segir gítarleikarinn Atli Sigursveinsson, sem hlakkar mikið til tónleikanna. Söngvarinn Arnór Dan Arnarson vildi ekkert gefa upp um hvaða lag Agent Fresco ætlaði að spila en tók fram að það væri erlent. „Þetta er klassískt og mjög sexí lag, það er það eina sem ég get sagt,“ segir hann. Agent Fresco hefur áður spilað á X-mas og spilaði þá Ég sá mömmu kyssa jólasvein, þar sem Arnór söng á dönsku. „Það gekk vel, held ég.“

freyr@frettabladid.is