Búist við mikilli umferð inn til höfuðborgarinnar síðdegis

Búist er við mikilli umferð inn til höfuðborgarinnar í dag á þessari fyrstu ferðahelgi sumarsins. Ökumenn eru hvattir til að fara varlega og fara ekki of snemma af stað eftir gleðskap næturinnar.

Lögreglan býst við að umferð inn til höfuðborgarinnar fari að þyngjast fljótlega eftir hádegi. Miðað við umferð á vesturlands- og suðurlandsvegi á föstudag megi búast við mikilli umferð í dag.

Einar Magnús Magnússon, upplýsingafulltrúi Umferðarstofu, segir þessa helgi eina af stærstu ferðahelgum sumarsins. Almennt hafi umferð gengið stórslysalaust fyrir sig að frátöldu óhappi í Ljósavatnsskarði síðdegis í gær.

Einar Magnús hvetur þá ökumenn sem eru eftirvagna á bílum sínum að haga akstri þannig að auðvelt sé að fara fram úr þeim. Þegar umferðin þyngist skipti þó miklu að halda jöfnum hraða.

Þá brýnir Einar Magnús það fyrir ökumönnum að leggja ekki of snemma af stað eftir gleðskap næturinnar.