Tvær af stúlkunum þremur sem fluttar voru á gjörgæsludeild Landspítalans í gær eftir alvarlegt bílslys eru látnar, samkvæmt upplýsingum frá vakthafandi lækni á deildinni. Sú þriðja er enn á gjörgæsludeildinni.
Fjögur ungmenni voru flutt á sjúkrahús eftir að bíllinn valt við Mánatorg norðan við Keflavík um hálfsjöleytið í gærmorgun. Í bílnum voru þrjár stúlkur og einn piltur. Öll voru þau rétt undir tvítugu. Stúlkurnar þrjár voru fluttar á slysadeild Landspítalans í Fossvogi, en svo á gjörgæsludeild. Pilturinn var fluttur á sjúkrahús í Keflavík.
Ekki hafa verið gefnar nánari upplýsingar um tildrög slyssins en lögreglan rannsakar málið.
Ekki verður greint frá nöfnum hinna látnu að svo stöddu.
Tvær látnar eftir bílslys
