Konudagurinn: Geðveik sveppasósa og rómantísk stemning

„Næsta laugardag?" spyr Jógvan Hansen söngvari þegar Visir spyr hvernig hann ætlar að gleðja kærustuna á konudaginn.

„Ég ætlað að gera eitthvað fyrir hana á sunnudaginn í staðinn. Hún á nefnilega afmæli á sunnudaginn. Svo ég ætla að reyna að vera góður við hana," útskýrir hann einlægur.

„Ekki það að það sé nokkuð erfitt að vera góður við hana. Hún á það skilið."

„Ég verð nú að finna handa henni einhverja sæta afmælisgjöf. Ég ætla allavegana að kaupa handa henni blóm og bjóða henni út að borða. Eitthvað gott."

„Bæjarins bestu eða kafbát mánaðarins á Subway. Ég er skólanemi veistu!" segir hann hlæjandi og heldur áfram:

„Ítalía veitingastaðurinn er svolítið í uppáhaldi hjá okkur. Svo ég held að mig langi að fara þangað með henni. Ég mæli með öllu hjá þeim. Eitt lítið glas púrtvín, ekta ítalska pizzu frá Tíno og svo kjúklingabringur með geðveikri sveppasósu og svo bara virkilega rómantísk stemning."

„Síðan ætla ég að fara með henni á Hellisbúann. Ég hef heyrt að hann er rosa skemmtilegur," segir Jógvan. -elly@365.is