Sjálfstæðismenn funda vegna afsagnar Þorgerðar

Miðstjórn Sjálfstæðisflokksins kemur saman til fundar í dag til að ræða þá stöðu sem upp er kominn í flokknum eftir að Þorgerður Katrín Gunnarsdóttir sagði af sér sem varaformaður um helgina. Þá verður einnig ræddur sá möguleiki að flýta Landsfundi flokksins.

Ekki liggur fyrir í lögum flokksins hvernig staðið skuli að kjöri nýs varaformanns láti hann af embætti á miðju kjörtímabili. Flokksráð hefur umboð til að velja nýja formann en ekki er tilgreint sérstaklega hvort ráðið geti einnig valið nýjan varaformann.

Þorgerður Katrín Gunnarsdóttir sagði af sér varaformennsku í flokknum um helgina en hún ætlar einnig að víkja tímabundið af þingi. Varaformenn eru kjörnir á landsfundum flokksins en sá næst er ekki fyrirhugaður fyrr en í september á næsta ári.

Fram kom í máli Bjarna Benediktssonar, formann Sjálfstæðisflokksins, á flokkráðsfundinum um helgina að hann hyggst leggja það til á miðstjórnarfundinum í dag að landsfundinum verði flýtt.

Jónmundur Guðmarsson, framkvæmdastjóri flokksins, sagði í samtali við fréttastofu í morgun að það taki nokkra mánuði að undirbúa landsfund.

Því þykir líklegt að miðstjórn láti flokksráði það eftir að velja nýjan varaformann - sem mun sitja fram að landsfundi. Kristján Þór Júlíusson, hefur verið nefndur í þessu samhengi en bauð sig fram til formanns á móti Bjarna Benediktssyni á síðasta landsfundi.