Þórður Ægir til Kabúl

Þórður Ægir Óskarsson sendiherra hefur á vegum Íslensku friðargæslunnar tekið að sér starf yfirmanns pólitískra mála á skrifstofu sérlegs fulltrúa framkvæmdastjóra Atlantshafsbandalagsins í Afganistan, Mark Sedwill. Er hann jafnframt staðgengill Sedwills, segir í tilkynningu.

Starf Þórðar felur meðal annars í sér ábyrgð á samskiptum og samvinnu við afgönsk stjórnvöld, þing og þingmenn, sendinefnd Sameinuðu þjóðanna í landinu (UNAMA), aðrar alþjóðlegar stofnanir og erlend sendiráð í Kabúl. Yfirmaður pólitískra mála tekur jafnframt virkan þátt í sáttaferli stríðandi fylkinga í landinu og samskiptum við nágrannaríkin, einkum Pakistan.

Hlutverk skrifstofu Atlantshafsbandalagsins í Kabúl er að fylgja eftir stefnu bandalagsins sem felst í að stuðla að auknu öryggi og stöðugleika í landinu og skapa grundvöll fyrir endurreisn og efnahagslegar framfarir.