Skúli er ekki hundur

Fyrstu tónleikar Skúla mennska og hljómsveitarinnar Grjóts verða á Café Rosenberg við Klapparstíg í kvöld kl. 21. Skúli er Þórðarson og hefur gert nokkrar heimatilbúnar plötur undir því nafni. Hann er auk þess í hljómsveitinni Sökudólgarnir sem gerði plötu fyrir tveimur árum.

„Ég fór tiltölulega nýlega að kalla mig „Skúla mennska“ og það hefur gefið góða raun,“ segir hann. „Eflaust væri hægt að vera með heimspekilegar vangaveltur um þetta nafn en sannleikurinn er nú einfaldlega sá að einn vinur minn á hund sem heitir líka Skúli og ég var því kallaður þetta til aðgreiningar frá hundinum.“

Skúli er uppalinn á Ísafirði og mennirnir í bandinu eru allir að vestan nema einn. Þar eru meðal annarra trommari Fjallabræðra og forsprakki sömu sveitar, Halldór Gunnar Pálsson, á gítar. Skúli og bandið æfa nú baki brotnu fyrir upptökur á væntanlegri plötu sem verður tekin upp í Tankinum í Önundarfirði bráðlega. „Platan ætti að skríða út um páskana,“ segir Skúli. „Þetta verða lög eftir mig, mest í amerískum þjóðlagastíl, en aðeins djass- og blús-skotið líka. Enda eru þetta allt saman náskyldar stefnur.“- drg