Hemmi veislustjóri Páls Óskars

Þótt ótrúlegt megi virðast verður Páll Óskar fertugur 16. mars næstkomandi. Hann heldur upp á tímamótin með þremur viðburðum, sem allir fara fram á Nasa.

Laugardaginn 13. mars verður sjálf afmælisveislan. Þá býður Palli vinum, ættingjum og samstarfsfélögum í gegnum tíðina til veislu. Boðið verður upp á tónlistarveislu þar sem margir af þeim sem hafa spilað með honum í gegnum tíðina ætla að skemmta. Veitingar koma frá Múlakaffi og Hemmi Gunn verður veislustjóri. Þetta er lokað boðspartí og búist er við 400-500 manns.

Ljósmyndari á vegum Páls verður á staðnum og tekur myndir af afmælisbarninu með gestum um leið og þeir mæta. Gestirnir fá svo myndina þegar þeir yfirgefa veisluna.

Síðar sama dag á miðnætti, þegar búið verður að sópa afmælisblöðrunum burtu, ætlar Palli að slá upp partíi og dj-a fram á morgun. Það kostar þúsund kall inn og ekkert rugl.

Í vikunni á eftir, fimmtudaginn 18. mars, halda svo Páll og hljómsveitin Hjaltalín sameiginlega tónleika. Hjaltalín leikur eigið efni en sameiginleg dagskrá verður um þriggja kortera löng. Hjaltalín og Páll æfa nú upp efni af krafti en miðasala er hafin á midi.is.

- drg