Ekki hægt að útiloka neinar tillögur

Huginn Freyr Þorsteinsson, aðstoðarmaður fjármálaráðherra, segir að fyrirfram sé ekki hægt að útiloka neinar tillögur í skattamálum.

Í skýrslu um íslenska skattkerfið, sem AGS vann að ósk fjármálaráðuneytisins, var lagt til að lægri skattþrep virðisaukaskattsins yrðu hækkuð upp í 25,5 prósent ef frá væru skildar matvörur sem yrðu með fjórtán prósenta virðisaukaskatt.

Meðal vara sem eru í dag með lægri skattprósentu má nefna bækur og dagblöð en í Fréttablaðinu á mánudag lýstu bóksalar yfir þungum áhyggjum af þessum tillögum.

„Ég held að við þær aðstæður sem eru uppi núna sé ekki hægt að útiloka neitt. Nefnd vinnur að tillögum í skattamálum og auðvitað reynum við að forgangsraða og velja tillögur sem skila mestu í framtíðartekjum án þess að hafa of neikvæð áhrif á hagkerfið,“ segir Huginn.

Að sögn bóksala myndi hækkun á virðisaukaskatti á bækur í 25,5 prósent öll fara út í verðlagið sem myndi þýða rúmlega sautján prósenta hækkun á verði bóka. Slík hækkun kæmi sérstaklega illa við háskólanema og fjölskyldur framhaldsskólanema.

Huginn segir að litið verði til slíkra sjónarmiða í skattavinnunni og að reynt verði að komast hjá því að leggjast í breytingar sem komi tekjulágum hópum illa. Hann segir þó að þessi tillaga AGS hafi ekki verið rædd sérstaklega í ráðuneytinu. - mþl