Þóra framleiðir myndir í Noregi

„Ég var boðuð í atvinnuviðtal um leið og mér var sagt upp á RÚV,“ segir Þóra Tómasdóttir, fyrrverandi sjónvarpsmaður í Kastljósinu.

Þóra flytur til Noregs á næstu vikum og hefur störf hjá kvikmyndafyrirtækinu Svensk Filmindustri (SF). Fyrirtækið er með höfuðstöðvar í Svíþjóð en Þóra mun starfa hjá fyrirtækinu í Osló. SF framleiðir og dreifir kvikmyndum, sjónvarpsefni og heimildarmyndum.

„Þetta er rosalega spennandi. Ég verð framleiðslustjóri yfir nokkrum heimildarmyndum,“ segir Þóra. „Svo verð ég í öðrum fjölbreyttum verkefnum.“ Þóra gerði heimildarmyndina Stelpurnar okkar, sem var frumsýnd í fyrra og fjallar um frábæran árangur íslenska kvennalandsliðsins í fótbolta. Heimildarmyndagerð er að hennar sögn fjársveltur iðnaður á Íslandi í dag og hún segir ótrúlegt að geta nú unnið við heimildarmyndir. „Það er allavega ekki hægt á Íslandi,“ segir hún.

Þóra fór út um síðustu helgi, gekk frá starfinu skriflega og tók íbúð á leigu.

Hún hyggst búa í Noregi í sjö mánuði og sjá svo til hvort hún vilji dvelja þar áfram.

Ertu komin í draumastarfið?

„Ég veit það nú ekki, en þetta er að minnsta kosti mjög spennandi vinna og það sem mig langar að vinna við. Ég læri hvernig almennilega fjármögnuð verkefni eru unnin.“

Nánar verður rætt við Þóru í helgarblaði Fréttablaðsins á laugardag. - afb