Orgelráðgjafi Hörpu fannst látinn

Heimsfrægur organisti, sem vann sem ráðgjafi við uppsetningu orgels í tónlistarhúsið Hörpu, fannst látinn á laugardag. Organistinn, David Sanger, hafði fyrr í vikunni mætt fyrir rétt, sakaður um að hafa misnotað gróflega unga drengi árin 1978 til 1982.

Breska blaðið Daily Telegraph greinir frá málinu, og segir að Sanger hafi fundist á heimili sínu í bænum Embleton. Rannsókn hafi ekki leitt neitt grunsamlegt í ljós.

Sanger var formaður Konunglegu organistasamtakanna í Bretlandi, sem vernduð eru af drottningunni, prófessor við Konunglegu tónlistarakademíuna í Bretlandi og hefur verið gestaprófessor víða. Hann hefur gefið út yfir tuttugu hljómplötur og hefur verið kallaður einn farsælasti orgelleikari heims.

Hann var handtekinn fyrr í maí eftir að lögreglunni bárust kærur á hendur honum fyrir kynferðisbrot frá fyrri tíð. Hann mætti fyrir rétt á fimmtudag og var sleppt gegn tryggingu. Hann átti næst að mæta fyrir dóminn 21. júlí.

Fram kemur í frétt Daily Telegraph að Sanger hafi undanfarið starfað sem ráðgjafi við uppsetningu nýs orgels í Bach-stíl í Háskólanum í Strathclyde, sem og við „nýtt orgelverkefni fyrir Íslenska tónlistarhúsið í Reykjavík“. - sh