Benedikt ofkældist ekki

„Við erum að reyna að gera sjósundið sem öruggast og leiðbeina þeim sem koma nýir inn í þetta,“ segir Benedikt Hjartarson, formaður Sjósunds- og sjóbaðsfélags Reykjavíkur. Fréttablaðið greindi frá því á miðvikudag að Karl Sigurðsson, einnig þekktur sem Karl West, formaður sjósundsselskapar Kaffibarsins, hafi verið fluttur kaldur á spítala eftir sjósund á dögunum. Nokkrir höfðu samband við Benedikt og höfðu áhyggjur af því að hann hefði verið sá kaldi, en hann hefur verið í forsvari fyrir því að fólk fari varlega við sjósund. „Við í félaginu höfum verið að beita okkur fyrir því að fólk fari varlega og fari aldrei einsamalt út í sjó. Starfsólk niður frá hefur líka fylgst með ásamt því að við fylgjumst með hvert öðru.“ Ekki er langt síðan sjósundsáhugi kviknaði á Íslandi, en Benedikt segir að engin stórslys hafi orðið á fólki síðan. „En það hefur gerst að fólk komi vannært eða ósofið og þá gerist það stundum að það fær blóðsykurs- eða blóðþrýstingsfall og líður illa í smá tíma – kólnar eða fær yfirliðstilfinningu,“ segir hann og beinir til fólks að fara hvorki svangt né ósofið í sjóinn. - afb