Paris Hilton tvisvar mynduð í íslenskum skóm á röltinu

Hótelerfinginn Paris Hilton gekk um götur Los Angeles og Salt Lake City í skóm frá Gyðju Collection í vikunni. Hönnuðurinn Sigrún Lilja fékk fréttirnar frá stílista Parisar og trúði varla sínum eigin augum þegar hún sá myndirnar. „Það var ótrúlega góð tilfinning að fá svona góðar fréttir og myndir frá stílista Parisar Hilton. Ég þurfti að nudda augun nokkrum sinnum því að þetta var svo óraunverulegt,“ segir Sigrún Lilja í Gyðju. Paris Hilton var stödd á Sun­dance-kvikmyndahátíðinni í Salt Lake City í síðustu viku. Hún var að sjálfsögðu hundelt af ljósmyndurum, sem náðu myndum af henni í íslenskum skóm frá Gyðju Collection. Hún var svo komin í aðra skó úr sömu línu í Los Angeles í vikunni þegar ljósmyndarar fylgdu henni í göngutúr með einum af hennar fjölmörgu hundum. Fréttablaðið greindi nýlega frá því að Paris hafi fengið vörur frá Gyðju og klæðst í nýrri seríu af raunveruleikaþættinum My Bff sem verður sýndur á sjónvarpsstöðinni MTV á næstunni. „Paris Hilton er að mínu mati mjög mikil fyrirmynd þegar kemur að tísku um allan heim og auðvitað er hvert hennar fótmál myndað,“ segir Sigrún Lilja. „Paris varð svo hrifin af skónum að hún ákvað að geyma vörurnar í fataskápnum sínum til að eiga möguleika á því að nota þá við hin ýmsu tilefni.“ atlifannar@frettabladid.is