Þjóðgarðurinn fái hótelbætur

Álfheiði Ingadóttur, formanni Þingvallanefndar, og Ólafi Erni Haraldssyni þjóðgarðsverði hefur verið falið af nefndinni að ræða við fulltrúa forsætisráðuneytisins um að þjóðgarðurinn fái að ráðstafa bótum sem fást eftir bruna Hótel Valhallar fyrir ári.

Þingvallanefnd telur þjóðgarðinn hafa orðið fyrir skaða við bruna Valhallar. „Valhöll var mikilvægur hluti af gæðum þjóðgarðsins og eftir bruna hússins hafa innviðir þjóðgarðsins því rýrnað.

Nefndin telur full rök til þess að tryggingabætur renni til uppbyggingar í þjóðgarðinum eins og áskilið er samkvæmt brunatryggingum,“ segir í samþykkt nefndarinnar.