Vildi ekki bögga Eið Smára

„Þetta er búið að vera ótrúlegt ferli," segir Róbert Örn Hjálmtýsson um gerð nýjustu plötu hljómsveitarinnar Ég, Lúxus upplifun. Hún kemur út á Gogoyoko.com í dag og verður fáanleg í búðum á næstu dögum.

Fimm ár eru liðin síðan Plata ársins með Ég kom út við góðar undirtektir. Hún var einmitt tilnefnd sem plata ársins á Íslensku tónlistarverðlaununum, fyrir lag ársins (Eiður Smári Guðjohnsen) og fyrir besta myndbandið (Kaupið plötu ársins).

„Það er langt síðan lögin voru samin en maður hefur bara hætt við útgáfuna út af alls konar atriðum. Til dæmis átti enginn meðlimur Ég barn, en núna eru sex komin og eitt á leiðinni. Svo eru líka alls konar menn sem ætluðu að gefa plötuna út en hættu við," segir Róbert Örn.

Hann fékk á sínum tíma vin sinn Eið Smára Guðjohnsen til að styrkja útgáfu Plötu ársins en ákvað að endurtaka ekki leikinn vegna Lúxus upplifunar. „Ég var ekkert að bögga hann í þetta skiptið. Ég truflaði hann örugglega síðast. Hann byrjaði ekki að skora mark fyrr en platan var komin út."

Róbert er sannfærður um að Lúxus upplifun sé besta plata Ég til þessa. „Því það eru textar við allt saman. Mig langaði að prófa að gera plötu þar sem eru hefðbundin lög, ef svo mætti segja, en á gömlu plötunni var anað úr einu í annað. Maður hefur fullt að segja. Ég vil vera einu stigi fyrir ofan og fara svolítið út úr boxinu."

Næstu tónleikar Ég verða á Venue í kvöld ásamt hljómsveitinni The Way Down kl. 22 og er aðgangur ókeypis. - fb

Á YouTube er hægt að horfa á lagið Sjónvarpið gæti selt okkur skít af Lúxus upplifun.