Magnús sem álfur í allra síðasta sinn

Nú styttist í mikla sýningu fyrir alla fjölskylduna en á laugardag leggur Latibær undir sig Laugardalshöllina. Hefur undirbúningur að Latabæjarhátíðinni staðið í langan tíma og verður öllu til tjaldað en fullyrt er að á hátíðinni komi Magnús Scheving fram í síðasta sinn sem íþróttaálfurinn. Staðfest er hverjir leika hinar landsþekktu persónur úr Latabæ: Örn Árnason er bæjarstjórinn, Gói er Glanni glæpur og við kynnum til leiks Unni Eggertsdóttur sem hina nýju Sollu stirðu.

Eftirfarandi stórstjörnur hafa þar að auki boðað gestakomu sína: Björgvin og Fransína mús, Ingó úr Veðurguðunum, Jónsi úr Svörtum fötum, Jógvan, Jóhanna Guðrún, Laddi, Skoppa og Skrítla og Sveppi & Villi.

Ráðgert er að skemmtunin taki um 70 mínútur en klukkutíma áður en fjörið hefst á sviðinu verður húsið opnað og það verður sannarlega nóg um að vera í anddyrinu þangað til tónleikarnir byrja. Töframaður mun leika listir sínar, krökkum mun bjóðast Latabæjarmyndatökur, hægt verður að taka þátt í lukkuleik og svo mætti lengi telja.

Boðið er upp á þrjú verðsvæði: númeraða stúku, ónúmeraða palla (uppselt) og ónúmerað standandi gólf. Á gólfinu verða þó sérstök barnasvæði í kringum fremsta hluta sviðsins og þar fyrir aftan sérsvæði fyrir foreldra viðkomandi barna, en á báðum þessum svæðum verður hægt að setjast á mjúkt gólf.