Slökkviliðsmenn þrífa hús á öskufallssvæðinu

Samkvæmt upplýsingum frá lögreglunni á Hvolsvelli vinnur nú fjöldi slökkvibíla og slökkviliðsmanna að því að þvo hús á öskufallssvæðinu. Lögreglan segir rólega virkni í eldstöðinni, ekki hafi borist tilkynningar um neitt öskufall en öskumistur er nokkuð vestan við eldstöðina, svo sem í Fljótshlíð og á Hvolsvelli.

Samkvæmt Veðurstofu Íslands sýndu vatnsmælingar hækkun yfirborðs í Markarfljóti í nótt og er það í samræmi við jarðskjálftavirkni. Þetta kom fram á upplýsingafundi fjölmiðla í Skógarhlíð í morgun. Jafnframt kom fram að erfitt hefði verið að fylgjast með gosvirkni með gervihnattamælingum vegna þoku í gær. Ratsjármælingar sýndu enga ösku en hún er enn til staðar.

Klukkan 7.30 í morgun hafði strókurinn breyst og var farinn að breiða sér meira lárétt en lóðrétt samkvæmt sérfræðingum Veðurstofu, líklega vegna norðvestlægrar áttar en hugsanlega einnig vegna þess að það varð örlítið landsig um kl. 3 í nótt.

Öskufalli er spáð norðvestur af eldstöðinni í dag, í nágrenni hennar, en öskumistur (þ.e. truflun á skyggni vegna öskunnar) gæti náð eitthvað vestar. Ekki er spáð öskufalli á höfuðborgarsvæðinu.

Umhverfisstofnun mælir loftgæði á landinu og fylgist vel með mælum. Tilkynningar verða gefnar út ef mælingar sýna svifryksmengun yfir hættumörkum og þörf á sérstökum varúðarráðstöfunum.

Fólki er bent á að fylgjast með fréttum og upplýsingum og leiðbeiningum á heimasíðu almannavarna, almannavarnir.is og á heimasíðu umhverfisstofnunar, ust.is.

Umhverfisstofnun setti upp loftgæðamæli á Kirkjubæjarklaustri fljótlega eftir að gos hófst í Eyjafjallajökli, en þar hefur engin sýnileg aska verið. Samkvæmt upplýsingum stofnunarinnar mældist svifryk þar undir mörkum, en verstu gildi sem mældust þar voru sambærileg við slæman umferðardag í Reykjavík. Loftgæðamælirinn hefur nú verið færður til Víkur.

Vegalengd frá eldstöð að Kirkjubæjarklaustri eru rúmir 80 km. Sama vegalengd í vesturátt frá eldstöð nær allt að Laugarvatni eða rétt vestur fyrir Selfoss.

Í Samhæfingarstöð almannavarna er náið fylgst með framvindu eldgossins á Eyjafjallajökli og reglulegir stöðufundir haldnir með þeim fjölmörgu stofnunum og fyrirtækjum sem koma að málum.

Fundur verður haldinn í Samhæfingarstöð í hádeginu með flugmálayfirvöldum, Landhelgisgæslu Íslands og Veðurstofu Íslands vegna lokana flugvalla þar sem reynt verður að spá fyrir um millilanda- og innanlandsflug næstu daga. Áfram er unnið hörðum höndum að áætlanagerð vegna truflana á flugi.

Af öryggisástæðum voru flugvél Landhelgisgæslunnar, TF-SIF, og þyrlan TF-GNA fluttar til Akureyrar þar sem búast má við að loftrýmið umhverfis Keflavíkur- og Reykjavíkurflugvöll lokist fyrir blindflugsumferð í ákveðinn tíma í dag í ljósi spár um gjóskudreifingu fyrir daginn.

TF-SIF flaug yfir gosstöðvarnar í morgun á leið til Akureyrar og hafa ratsjármyndir verið sendar Veðurstofu og Raunvísindastofnun til upplýsinga.