Formannsslagur BÍ: Gefur kost á sér vegna óánægju

„Það hefur verið ágreiningur á milli mín og formannsins um starfsaðferðir og stefnumörkun," segir Hjálmar Jónsson, framkvæmdarstjóri Blaðamannafélags Íslands en hann hefur gefið kost á sér í formannsembætti félagsins.

Blaðakonan Þóra Kristín Ásgeirsdóttir hefur verið formaður félagsins og býður sig fram á ný.

Hjálmar segir að það hafi borið á óánægju félagsmanna með störf formannsins og því hafi hann verið hvattur til þess að gefa kost á sér.

„Og mér fannst ég ekki geta skorist undan því," segir Hjálmar en hann er ekki ókunnugur formennsku félagsins því hann gegndi því embætti um fjögurra ára skeið.

Formannsslagir eru ekki algengir í Blaðamannafélaginu. Þóra Kristín sigraði Kristinn Hrafnsson fyrir ári síðan þegar kosið var um formann félagsins. Svo tókust þau Róbert Marshall og Guðrún Helga Sigurðardóttir á um formannsembættið árið 2003. Þá sigraði Róbert.

Svo þarf að leita aftur til níunda áratugarins til þess að finna annan formannsslag.

Kosningin fer fram á aðalfundi félagsins sem fer fram á fimmtudaginn næsta klukkan átta.